SATS PÅ HALLINGDAL

Hallingdal er hardt ramma av koronaepidemien, med stor arbeidsledighet og press på arbeidsplassar og bedrifter. Sjølv om den internasjonale turismen blir forventa å ta seg opp att, har pandemien synleggjort Hallingdals einsidige avhengigheit av reiselivsnæringa.
Hallingdalsregionen er med andre ord sårbar, det er ynskje om å vidareutvikle reiselivet og skape eit breidare og meir robust næringsgrunnlag.

Med bakgrunn i dette søkte Hallingdalsregionen Viken fylkeskommune om omstillingsstatus.
Viken fylkeskommune vedtok i mars 2021 å gje Hallingdal omstillingsstatus for ei periode på tre år. Omstillingsstatus skal bidra til å vitalisere og forsterke næringsutviklingsarbeidet i regionen.
Fylkeskommunen har trødd til og finansiert det treårige prosjektet med to millionar kvart år. I desse dagar blir det lyst ut stilling som prosjektleiar.

Men like viktig er det å få med lokalt næringsliv og politisk miljø.
Det er i ferd med å bli sett ned ei styringsgruppe for prosjektet, der alle seks ordførarane i Hallingdal er med. I tillegg vil ein ha med tre representantar for næringslivet, der dagleg leiar Roger Espeli ved Vestlia Resort på Geilo, er ein av dei.

Målet er at arbeidet skal munne ut i ein handlingsplan der ein ser heile regionen under eitt. Det siste er viktig fordi Hallingdal er ein tydeleg bu- og arbeidsregion, fordi reiselivet jobbar aktivt for å bli ein berekraftig reiselivsregion og fordi kommunane har ganske likt utfordringsbilete og tett samarbeid frå før.　

Innovasjonsselskapet Proneo AS er innleigd for å bistå Regionrådet for Hallingdal i arbeidet med å leggje grunnlaget for denne fleirårige satsinga på næringsutvikling.